حزب النور
يبقا مش فاهم اللى يعتقد إن حزب النور بقاله 3 شهور بس على الساحة لأن قطاع السلفين فى مصر وهو قطاع كبير لا يستهان به متواجد على الساحة منذ الستينيات عندما كان الشيخ كشك يحارب النظام السياسى بخطبه وكان وقتها النظام السياسى من أسوأ النظم اللى مرت على المحروسة وكان دايما ياخد شنطة هدومه معاه يخلص الخطبة وينزل يركب البوكس على المعتقل علطووووول , وبالتالى نجد أن حزب النور أنشىء على خلفية سياسية تفوق ال30 سنة مش 3 شهور وبالتالى فهما عندهم فكر سياسى عالى جدا" من وجهة نظرى المتواضعة ولكن يظل علمهم نظريا" وده بعد ما إختارو عن عمد ودون تهميش من أحد أن يظلوا بعيدا" عن دهاليز السياسة المصرية طوال 30 عاما" الأخيرة لأنهم كانوا مقتنعين تماما" بأن الحياة السياسية فى مصر كانت مسرحية هزلية فيها بطل أوحد ومجموعة من الكومبارس الهابط اللى حتى مش بيعرف يمثل دوره كويس وأنا كنت واحد من المقتنعين بكده فالحزب الوطنى كان البطل الوحيد للمسرحية أما الوفد وباقى الأحزاب الوهمية كانت مجرد أداة فى إيد أخواتنا البعدا وبالتالى فإن السلفين تنقصهم خبرة التطبيق العملى للسياسة وده ظهر كويس قوى فى المرحلة الأولى من الإنتخابات وليا تعليق على نقطتين او بمعنى أصح مشكلتين وقع فيهم حزب النور بصفته ممثل لقطاع كبير جدا" من السلفيين فى مصر :
- المشكلة الأولى وهى إنهم مشوا ورا عمرو أديب ومن شابهه (أنا مش بأهاجم عمرو هو أحسن محاور فى مصر وصاحب أنجح برنامج توك شو فى مصر لكن أنا باتضايق منه قوى بسبب هجومه الغير مبرر على الإسلامين) فى إنهم يردوا الإتهامات اللى شغالة عمًال على بطًال وكلها محصورة فى البكينى والبنوك و الحدود ونسيوا خااااااااااااالص إنهم حزب سياسى نازل إنتخابات يعنى عندهم برنامج إنتخابى لازم يشرحوه للناس كويس جدا" نسيوا إنهم بينساقوا لفخ كبيييييير من الإعلام اللى معظمه علمانى وليبرالى بشكل فج جدا" وإنهم لازم يفكهم من الكلام التافه ده ونسيوا إن الوسيلة الوحيدة اتطمين الناس هو شرح برنامجهم وشرح إزاى هايوفروا الأمن والعمل والغذاء (قنوات زى الرحمة والناس متشافة من 60 فى الميه من الشعب المصرى تقريبا" كان لازم يستغلوها فى شرح برنامجهم الإنتخابى مش بس الرد على الإتهامات اللى استنزفتهم) ودى أول غلطة غلطها حزب النور فى المرحلة الأولى من وجهة نظرى ولااااااااااااازم يتلافوها فى المرحلتين الجايين.
- المشكلة التانية ودى أخطر بكتيييييييير جدا" من الأولى وهى عدم إختيار المرشحين على المقاعد الفردية بشكل يوفق منطق القوى الأمين وهنا بقا القوى يعنى القوى فى السياسة مش فى حاجة تانية أنا اسف بس احنا مش محتاجين مشايخ فى البرلمان احنا محتاجين ناس تعرف تسحب الثقة من الحكومة ناس تعرف تمسك وزير تغسله بالطريقة والمستندات مش مرشح يطلع مع جميلة إسماعيل وتجيبه يمين وشمال وهو لا بيصد ولا بيرد مع إحترامى الشدييييييد له وهو بجد إنسان محترم وليا إقتراح بسيط جدا" ومتواضع جدا" وهو إنى كحزب نور أهتم بالنزول كقوائم والتى لابد وأن تضم مجموعات من المؤهلين علميا" وإقتصاديا" وسياسيا" ولديهم الحد الأدنى من الخبرة فى شتى مجالات الحياة وعلى فكرة هاينجحوا لأنى كناخب هأختار حزب النووووور مش مرشح فردى ودى فرصتك فى تمرير كفاءات تقوم بتطمين الناس عن طريق سياسات واقعية ممنهجة تجعل من الإكتفاء الغذائى والأمنى والعلمى هدفا" لبرنامجهم وعند تحقيقه فإن حزب النور سيكون موضعا" لثقة الكثيرين جدا" من الشعب المصرى.
أتمنى عن حق أن يتلافى حزب النور ما بدر منه من أخطاء خلال المرحلة الأولى وأن يوفقهم الله فى المرحلتين القادمتين بمشيئة الرحمن.
